GENERAL SANTOS CITY -Pakyas ang mga doktor sa Dr. Jorge P Royeca Hospital nga ma-revive ang usa ka pasyente human naghikog sulod mismo sa naasoy’ng tambalanan.
Giila ang maong pasyente nga si Rey Daguman, 37-anyos, taga-Iligal City, nga na-confine sa tambalanan tungod sa intenstinal obstruction.
Base sa report, pasado alas-12 kagabii dihang misulod sa banyo ang naasoy’ng pasyente.
Nahibulong na lang ang ubang pasyente gumikan hilabihan na kining kadugay sa sulod, hinungdan nga pugsanon nila kining giablehan.
Naabtan na lamang nila kining nagbitay na gamit ang habol.
Nagtinabangay ang mga watchers sa ospital aron ipanaog ang biktima, ug gidala sa emergency room ug gisulayan nga i-revive sa mga doktor apan nabakwian gihapon sa kinabuhi.
Gituuhang ang giantos niini nga grabeng pagsakit sa tiyan tungod sa iyang sakit, ang nagtukmod sa maong pasyente nga maghikog.
