GENSAN – Makaapekto usab sa mga iro ug uban pang mga hayop ang hilabihang kainit sa panahon.
Kini ang gibutyag ni Dr. Emil Gargaran sa City Veterinary Office, kung asa mas taas matud pa ang ihap sa kaso sa rabies kon init kaayo ang panahon.
Kini gumikan sa gausab matud pa ang ilang behavior ug mamahimong iritable kon init ang panahon.
Nasayran nga matag bulan sa Marso gikonsidera usab nga Rabies Awareness Month.
Matud pa ni Dr. Gargaran, ang rabies ang usa sa labing delikado nga viral disease, kung asa 100% fatal kon makamatay, hilabi na kon mataptan ang tawo.
Hinungdan nga angayan matud pa nga mapabakunahan gayud ang mga iro, aron mahimo usab 100% nga malikayan nga mataptan kini ug rabies.
Samtang kon ang tawo usab ang mapaakan ug iro, angayan gayud matud pang mudiretso sa doktor ug magpabakuna ug anti-rabies, ug dili magpatandok, aron maluwas ug dili mamatay.
Nasayran nga miaging tuig, nanguna ang GenSan sa may labing daghang kaso sa animal-rabies sa tibuok nasud, nga may 36.
