GENSAN – Patay ang usa ka negosyante human gipusil sa nakamotorsiklo, samtang anaa sulod sa iyang sakyanan.
Natigayon ang insidente sa Bulaong Ave., kung asa giila ang biktima nga si Francisco Soria Jr., 35-anyos, residente sa Issabella Homes, Brgy San Isidro ning siyudad.
Base sa inisyal nga imbestigasyon, pasado alas-5:00 sa hapon kagahapon, sakay ang biktima sa iyang SUV samtang nagpaabot sa iyang asawa nga mugawas sa ilang tindahan. Kalit matud pang may miabot nga motorsiklo, dayon gipusil ang biktima agi sa bintana sa sakyanan.
Gikabutyag nga nag-inusara lamang ang suspek nga sakay sa XRM itum ug puti nag-inusara ug naka-helmet ug naka-jacket.
Paspas matud pang misibat ang suspek human gihimo ang krimen, samtang gilayong nakabsan sa kinabuhi ang biktima tungod sa naangkon nga samad-pinusilan sa lawas ug sa ulo. Narekober sa crime scene ang tulo ka empty shells sa wala pa matumbok nga matang sa armas.
Giimbestigahan na sa kapulisan ang nasampit nga insidente.
