GENERAL SANTOS CITY-Hapit makaabot sa South Korea ang gipangita nga mananagat human maagi-an ug barko samtang nagpalutaw-lutaw sa lawod.
Kini human gikumpirma ni Zoraida Arial nga taga Taguin, Balut Island Sarangani Davao Occidental nga nakabalik na sa ilang pinuy-anan ang 27 anyos nga anak nga si Marvin.
Kahinumduman nga nanawagan dinhi sa sibyahanan ang Inahan human mawala ang anak samtang sakay sa iyang pacura.
Nagub-an matud pa ug makina ang Facura sa biktima hinungdan nga magduha ka adlaw kining naa sa lawod.
Gisaysay sa inahan nga gisakay ang anak sa barko nga paingon sa South Korea kaniadtong martes sa kaadlawon.
Gikumpirma usab kini sa Philippine Coast Guard dihang nakadawat ug tawag hinungdan nga gisundan ang barko ug gitagbo ang biktima ug gidala balik sa Sarangani island.
Human masusi sa mga doktor ang 27-anyos gilayon kining gitugyan sa iyang inahan ug gidala balik sa ilang lugar.
