GENSAN- Gikasuhan na ug pagsupak sa Sections 5 kon pagbaligya ug Section 11 kon paghupot, sa RA 9165 kon Comprehensive Dangerous Drugs Act of 2002, ang mga dinakpan sa gipahigayong duha ka managlaing buy-bust operation sa mga sakop sa Philippine Drug Enforcement Agency 12 sa South Cotabato, kaniadtong Lunes.
Una niini, nasikop ang nagpangalan ug Charwin Loplop alias Toto, 30-anyos, usa ka high-value target, sa Purok 5, Brgy. Maltana Tampakan, South Cotabato, Lunes sa hapon.
Narekober gikan kaniya ang siyam ka sachet sa shabu nga gibanabanaang anaa sa 20 gramos, nga may estimated market value nga P100,000, gawas pa sa mga drug paraphernalia, cellphone, ug P500 nga marked money.
Gikabutyag nga si Alias Toto ang nalambigit sa pagpayuhot ug iligal nga droga sa Tampakan ug sa mga kasikbit nga munisipyo.
Gawas sa nasampit nga mga kaso, kasuhan usab siya ug pagsupak sa Section 12 kon paghupot ug drug paraphernalia.
Samtang, sa operasyon nga gipahigayon sa PDEA-12 sa Brgy. Poblacion, Tacurong City Sultan Kudarat, nasikop ang nagpangalan ug Vic Abuton Jr., alias Ping-Ping, 40-anyos, usa ka mag-uuma nga residente sa nasampit nga lugar.
Nakumpiska gikan kaniya ang unom ka pinaugang dahon sa marijuana nga may estimated market value nga P21,000, ug usa ka gatos ka pesos nga marked money.
