GENERAL SANTOS CITY -Subling nagpahimangno ang Traffic Management Unit dinhi sa dakbayan, ngadto sa mga residente nga mag-amping gayud sa pagmaneho, ug kanunay’ng musunod sa mga balaod-trapiko, aron makalikay sa aksidente sa dalan.
Sa pakighinabi sa Bombo Radyo kang Police Chief Inspector Ruelito Lumiguid, gibutyag niini nga alang sa bulan sa Enero ning tuiga, mukabat sa 185 ka aksidente sa dalan ang ilang natala, kung asa upat ka tawo ang patay.
Gikabutyag nga sagad niini ang gumikan sa overspeeding ug pagsupak sa balaod-trapiko nga miresulta sa disgrasya.
Gamay lamang matud pa ang diperensya niini sa natala nga 191 ka aksidente ug unom nga patay, sa susamang peroiod miaging tuig.
Kahibaluan nga ning sayong bahin sa bulan sa Pebrero usab, pipila na ka mga aksidente sa dalan ang natala, kung asa miaging adlaw adunay duha ka motorsiklo nga nagbanggaanay.
Ug gani, ang driver sa usa ka motorsiklo ang gilayong namatay, samtang laing usa ang nabakwian usab sa kinabuhi sa balay-tambalanan.
Matud pa ni Lumiguid nga tungod kadto sa pag-ilugay ug dalan sa mga driver, nga kon unta naghinay-hinay lamang ug nagmakalmahon, dili unta musangko sa maduguon nga aksidente.
