GENERAL SANTOS CITY – Nagpaklaro si Geraldine Zamora, labaw sa Business Permits and Licensing Division ning siyudad, kalabot sa proseso sa pagkuha ug pagrenew sa business permit.
Sumala pa nga dako ang ilang pasalamat sa USAID’s Strengthening Urban Resilience for Growth with Equity (SURGE) Project gumikan mas napapaspasan ang proseso, itandi sa mga nakalabay’ng tuig.
Dugang pa ni Zamora, kon kaniadto mulinya pa ang mga negosyante alang sa approval sa gross sales, karon, base sa gipatuman nga ordinansa, kon ang gross sales miaging tuig dugangan ug 5% o 15% ug nakab-ot ang pinakataas nga bracket, diretso na.
Apan may mapilian matud pa ang mga negosyante. Sumala pa nga kon nalugi ning tuiga, human sa pagproseso sa renewal, pwedeng mubalik ug muhangyo ug adjustment sa City Treasurers Office.
Gikabutyag nga kon magpabilin sa susamang bracket, walay mamahimong pag-usbaw sa bayaran nga buhis.
Apan kon mulapas na sa pinakataas nga bracket, 5% lamang ang madugang sa buhis.
Dungan niini, nanawagan si Zamora sa tanang negosyante nga mulihok na ug asikasuhon na ang renewal sa business permits gumikan hangtod na lamang kini sa tungang gabii sa Enero 20.
Hinuon, human sa deadline mahimo gihapon matud pang magparenew ug business permits, apan pahamtangan na ug surcharge nga 25% ug penalty nga 24%. Gilauman nga una ang deadline, muabot sa 80 percent ang makapa-renew sa ilang business permits.
