GENERAL SANTOS CITY – Nanghinaut si Sr. Insp. Robert Forez sa Makar Police Station nga mauli sa pag-areglohanay ang bangi tali sa pulis og sundalo sa checkpoint sa round ball diversion Road Brgy Sinawal ning syudad miaging gabie.
Kini natigayon dungan sa paghidangat ni Pangulong Rodrigo Duterte sa dakbayan nga mitambong sa birthday ni Sen. Manny Pacquiao.
Matud pa ni Forez, sa iyang personal nga opinyon nga personal nga sakyanan ang gigamit ni Sr. Insp. Riza Santos hinungdan nga wala nasayod ang mga sundalo nga nagpahigayon ug checkpoint nga opisyal ang nagsakay.
Sa pamahayag ni Forez nga gihimo lamang ni Corporal Montefalco sa Joint Task Force Gensan ang iyang trabaho nga nagbantay sa checkpoint hinungdan nga gipahunong ang sakyanan.
Apan nanghinaut nga magpasayluanay ang duha ka kampo og maplantsa ang unsa mang bangi tungod parehong anaa sa gobyerno.
Sa pamahayag niini nga gustong sayron ang bersyon ni Santos sa panghitabo nga una ng nagbutyag nga gitutukan siya ni Corporal Montefalco og pusil.
Nahibaluan nga nagdali si Santos samtang nakahazard ang sakyanan aron isumite ang papeles sa PRO-12 ug sa dihang gilihis ang sakyanan sa checkpoint dinhi na kini gipahunong.
Una ng gibutyag ni Col. Adonis Bajao sa JTF-GenSan nga giimbestigahan na ang maong panghitabo.
