GENERAL SANTOS CITY – Nagpabiling gawasnon ang panday nga responsable sa pagpanigbas sa usa ka seaman sa Upper Banualan Tambler ning syudad.
Giila ang suspek nga si Joseph Galagati 50 anyos nga residente sa maong lugar.
Matud sa asawa nga si Julie, wala siya magdahum nga nahimo sa bana ang pagtigbas patay sa biktima nga si Melchor Coronado, hamtong, nga taga Fatima.
Nag-atiman siya sa iyang apo dihang nahitabo ang insidente apan nakadungog na siya niadtong tungura nga naglalis ang bana og ang biktima apan wala niya panumbalinga.
Gibutyag sa asawa, wala niya mabantayan nga nikuha ug sundang ang bana sa ilang kusina ug gitigbas ang biktima sa makadaghang higayun hinungdan sa kamatayon.
Apan giangkon niini nga kanunay ga-mulo ang bana sa dili maayong pasuweldo sa biktima sa mga nagtrabaho sa iyang boarding house.
Sa pamahayag sa asawa nga wala siya nasayod kung asa na karon ang iyang bana human nga gidala ang ilang motor.
Gibutyag ni Spo1 Ronald Guardados sa Tambler Police station nga bisan gawasnon ang suspek, ipasang-at gihapon nila ang kaso batuk sa suspek.
Kahibaluan nga natigayon pa ang ginukdanay tali sa suspek ug biktima sa compound sa boarding house apan naapsan sa suspek ang biktima nga gidunggab sa makadaghang higayon hangtud nga mapatay.
