GENERAL SANTOS CITY – Angol nga nadala sa ospital ang asawa sa usa ka pulis human nga gipusil sa riding in tandem criminals sa Prk. 4, Bulaong Village, Labangal ning dakbayan, pasado alas 6:00, Martes sa gabii.
Giila ang biktima nga si Teresa Enoy, asawa ni Po1 Denmark Enoy, naka-assign sa City Intelligence Branch sa General Santos City Police Office (GSCPO).
Gibutyag ni P/Sr/Insp. Robert Fores sa Makar Police Station, natigayon ang pagpamusil alas 6:10 kagabie kung asa ang magtiayon ang namalit og kape sa tindahan.
Sa ilang pagbalik ngadto sa ilang giabangan boarding house sa lugar, nasugat-an ang riding in tandem criminals sakay ang duha ka lalaki nga parehong naka-helmet.
Gipabuthan ang magtiayon duha ka higayon og naigo ang asawa ni Po1 Enoy sa kilid sa tiyan nga bahin og sa paa hinungdan nga gidala sa balay tambalan.
Paspas nga mipalayo sa lugar ang duha ka responsable gamit ang getaway vehicle nga XRM 125 kulay itum nga walay plaka.
Nagtuo si Fores nga si Po1 Enoy ang target sa mga suspek og naangin lamang ang asawa niini.
Pagkakaron padayon pang giimbestigahan ang maong panghitabo.
