GENERAL SANTOS CITY – Padayong gipailawom sa imbestigasyon ang managsuon nga matud pa key players sa local terror group nga Anzhar Al–Khalifa Philippines (AKP) nga nasikop sa gipahigayong operasyon sa mga otoridad sa Brgy. Kanalo, Maasim, Sarangani Province kaniadtong Miyerkules, Nobyembre 1.
Kahibaluan nga gipangunahan sa Philippine Drug Enforcement Agency 12 ug Joint Task Force (JTF) GenSan ang naasoy’ng operasyon aron ipatuman ang search warrants kung asa target silang Faroon Lumatao, 35-anyos, usa ka negosyante, ug igsuon nga si Alhotaibby Lumatao Alias AL (HVT), 36-anyos, nga mao usay driver ug close-in security sa nahisgutan.
Sa pakighinabi sa Bombo Radyo kang PDEA-12 Regional Director Gil Castro, gibutyag niini nga ang naasoy’ng operasyon ang kabahin ug pagpadayon sa ilang paggukod sa mga miyembro sa El Patron Drug Group.
Sumala pa nga common denominator sa AKP ug Maute terror group mao ang managsamang pagkalambigit nila sa ISIS.
Kahibaluan nga mukabat sa 40 gramos o halos tunga sa milyon nga kantidad sa droga ang nakumpiska sa mga otoridad gikan sa duha ka dinakpan, usa ka brown envelope nga may money trails document, usa ka rifle grenade, hand grenade, usa ka unit sa 40mm grenade launcher, pito ka rounds sa 5.56 live ammunitions, ubay-ubay ka bank deposit slips, cheques ug savings account passbook, ug usa ka bag nga may mga salapi sa nagkalain-laing denominasyon, ug bandila sa ISIS.
Nagpasabot matud pa kini nga ang mga kalihukan sa naasoy’ng mga teroristang grupo ang gipalihok sa salapi gikan sa pagbaligya ug iligal nga droga.
Ang duruha ang nag-atubang ug kasong pagsupak sa Section 11 sa Article II sa RA 9165 ug RA 9516 kon Illegal Possession of Ammunition and Explosives, kung asa ang duruha ang kasamtangang balhug sa PDEA XII Detention Facility.
