GENERAL SANTOS CITY- Angayang ipa-kilo kon ipatimbang una kon mupalit ug LPG.
Kini ang tambag sa publiko ni City Assistant Administrator Engr. Teody Dumagan, aron matud pa makasiguro nga insakto sa timbang sa gipalit nga tangke.
Alayon kini sa gipahigayong reinforcement sa Task Force LPG dinhi sa dakbayan, dungan sa kasaulogan sa Consumer Welfare Month nga ginasaulog matag Oktobre, kung asa ang tema ning tuiga mao ang “Consumer Rights in the Digital Age.”
Kahibaluan nga miaging semana, nagpahigayon ug pag-inspeksyon ang mga ginsakpan sa Task Force LPG sa mga tindahan sa LPG dinhi sa siyudad.
Nadiskubrehan nga may pipila ka mga tanke ang kulang sa timbang nga miabot sa napulo, hinungdan nga gipangkumpiska ug gipabayad ug multa ang mga tag-iya sa tindahan.
Kahibaluan nga sa unang offense sa establismento, P1,000 matag tangke ang multa, P2,000 sa second offense, samtang P 3,000 ug kanselasyon sa business permit alang sa third offense.
Dungan niini, gihingusgan ni Engr. Dumagan nga unod ug dili ang tangke sa LPG ang maoy ginapalit sa mga konsumante.
