Sulat sa GenSan Mayor kalabot sa cease and desist order batok sa STL, wala gidawat
GENERAL SANTOS CITY – Wala gidawat sa main office sa Small Town Lottery kon STL dinhi sa dakbayan, ang sulat kalabot sa cease and desist order ni Mayor Ronnel Rivera batok sa STL.
Kini ang gibutyag ni Geraldine Zamora, labaw sa City Permits and Licensing Divion, human matud pa nila giadtuan ang main office niini sa Silway.
Sumala pa nga base sa pahayag sa mga naabtan nila nga empleyado, may instruction kanila nga dili dawaton ang naasoy’ng kamanduan.
Dungan niini, giangkon ni Zamora nga misakit ang iyang ulo tungod sa nahitabo. Gumikan niini, misulat usab si Zamora kang Mayor Rivera aron ipadangat ang nahitabo, ug gipaabot kon unsa ang angayang himuong aksyon.
Kahibaluan nga gisugdan na sa City Permits ang pag-inspeksyon sa outlets sa STL sa siyudad.
Apan aminado si Zamora nga dili sayon ang pagpasirado sa mga STL outlets, hilabi na nga magkinahanglan ug mga kahimanan.
Kahibaluan nga dinhi sa dakbayan, bisan ang small town lottery kon STL ang makonsidera usab nga iligal gumikan wala nahisubay sa IRR, sama na lamang sa pagbase gihapon sa resulta sa draw sa lotto ug paggamit ug dili otorisadong papel, gawas pa nga walay concurrence gikan sa Sangguniang Panglungsod.
