GENERAL SANTOS CITY- Mipasalig si Col. Tyne Bañas, labaw sa 1002nd Brigade Philippine Army, nga muhatag sila ug financial assistance, gawas pa ang gikan sa Armed Forces of the Philippines, alang sa nabilin nga pamilya ni Pfc Felmark Dalogdog, ang scout ranger nga napatay sa engkwentro sa Marawi.
Kini human miabot kagahapong adlawa dinhi sa dakbayan ang patay’ng lawas sa nasampit nga sundalo, nga gisugat sa iyang pamilya sa airport, dayon gidala sa Colon, Maasim, Sarangani kung asa kini kasamtangang gihaya.
Samtang, luyo nga nadawat na ang nahitabo sa igsuon nga isip usa usab ka sundalo dili gayud malikayan ang mga susamang panghitabo, nanawagan si Pfc Kent Carlo Dalogdog ngadto sa mga rebelde nga undangon na ang pagpahigayon ug kasamok, gumikan daghan lamang ang mangamatay ug daghang pamilya ang magsubo ug mawad-an ug mahal sa kinabuhi.
Nasayran nga si Pfc Felmark ang napatay human maigo sa dughan sa sniper nga gikan sa mga Maute terror group.
