GENERAL SANTOS CITY – Usa ka hero’s welcome ang musugat sa patay’ng lawas ni Pfc Marvin Gomez, sa pag-abot niini dinhi sa dakbayan.
Si Pfc Gomez ang usa sa mga sundalo nga namatay samtang nakig-giyera batok sa Maute terror group sa Marawi City.
Base sa report, gilaumang mahidangat dinhi sa siyudad ang patay’ng lawas ni Pfc Gomez, alas 10:00 sa buntag, dayon ipahigayon ang hero’s welcome.
Kini isip paghatag ug pasidungog ug pag-ila sa kabayanihan nga gipakita sa nasampit nga sundalo, sa pakig-giyera batok sa mga terorista, nga maoy hinungdan sa iyang pagkamatay.
Kahibaluan nga miaging adlaw pang andam ang ilang panimalay sa Lower Puting Bato, Brgy Calumpang, kung asa gikabutyag nga ihaya ang patay’ng lawas ni Marvin.
Kahinumduman nga plano usab sa lokal nga panggamhanan nga maghatag ug financial assistance isip tabang alang sa pamilya sa naasoy’ng sundalo.
Wala pa masayran kon kanuns-a kini ilubong.
Kahibaluan nga ang uban niining mga kauban nga sundalo nga namatay usab sa Marawi ang napanghatod na sa ilang ulahing kapahulayan, sa ubang bahin sa nasud.
