GENERAL SANTOS CITY – Gilaumang ipasaka ning adlawa ang kasong robbery with force upon things batok sa kawatan nga naaresto sa kapulisan human nga gisulod ang usa ka balay sa Agan Centro Lagao ning dakbayan.
Giila ang suspek nga si Joel Awat, 20 anyos walay trabaho nga taga residente sa Carcon Village, Brgy. Lagao ning dakbayan.
Matud sa Lagao Police Station, nagpabiling balhog sa ilang selda ang suspek samtang gipaabot ang kasong ipasaka batok kaniya.
Kahibaluan nga gipanghimakak sa suspek nga nangawat siya sa balay ni Rogelito Escuadra, empleyado sa LGU-Sarangani Davao Occidental.
Misulod lamang siya sa maong balay aron adunay katulogan tungod wala matud pa siyay maulian.
Apan wala kini gituohan sa kapulisan tungod kini matud pa ang kasagaran nga alibay sa mga madakpang kawatan.
Kahibaluan nga nadiskubre sa tag-iya nga sa bintana niagi ang suspek tungod naguba na ang jealosy sa bintana sa iyang kuwarto.
Ug gani, naabtan pa niya ang suspek pag-abot niya sa iyang balay gikan sa Sarangani Davao Occidental nga hinanok nga natulog sa iyang higdaanan.
Hilom lamang nga migawas ang tag-iya ug gilayong nagreport sa kapulisan kon asa dihang gisrespondihan ang balay, naabtan pa sa kapulisan ang suspek nga natulog giahpon hinungdan nga gilayong giposasan og gidala sa presinto.
Nasayran nga duha ka adlaw nga nitinir ang suspek sa balay kon asa didto na kini galuto og pagkaon og gatulog.
Narekober sa dakong bag sa suspek ang sapatos, rice cooker, plantsa, electric fan og daghang sapot sa biktima.
