GENERAL SANTOS CITY – Posibleng dinhi sa dakbayan sugdan ni Sen. Manny Pacquiao ang iyang pagbansay alang sa umaabot nga away sa Australian boxer nga si Jeff Horn.
Kini ang gibutyag sa igsuon niini nga si City Councilor Bobby Pacquiao. Sa pakighinabi sa Bombo Radyo, gihingusgan ni Kag. Bobby nga kinahanglang pangandaman pag-ayo ni Manny ang nasampit nga away nga matigayon na sa Hulyo 2 ning tuiga.
Sumala pa nga bisan ug underdog si Horn, dili angayang magkumpiyansa gumikan usa usab kini boxer ug nasayod ang tanan nga buot niining pildihon ang Pinoy ring icon.
Hinungdan nga kinahanglan matud pang tabangan ang igsuon pinaagi sa pag-ampo, aron walay mahimong babag sa himuon niining training.
Gikabutyag nga human sa promotional tour nga magsugod sa April 24 sa Brisbane, Australia, magbansay una si Pacquiao dinhi sa dakbayan ug ipadayon kini didto sa Kauluhang Maynila.
Ang Pacquiao-Horn fight ipahigayon sa Suncorp Stadium, Brisbane, Queensland, Australia, kung asa depensahan sa fighting senator ang WBO welterweight title. Si Horn ang may 16 ka daog, walay pildi ug usa ka draw, samtang si Pacquiao ang may 59 wins, unom ka pildi, duha ka draw ug 38 ka knockouts.
