GENERAL SANTOS CITY – Mag-atubang ug kasong murder ang duha ka menor de edad nga suspek nga nasikop gumikan sa pagtigpas-patay sa 21 anyos nga biktima nga si Michael John Llames sa Macopa St. Brgy Dadiangas North ning dakbayan.
Kahinumdman nga natigayon ang insidente kagabii, kung asa pagka-alas-3:00 sa kaadlawon nakabsan sa kinabuhi ang biktima samtang gitabang sa mga doktor, gumikan sa naangkon nga dagkong samad-tinigbasan sa ulo.
Kahibaluan nga nadala usab sa tambalanan ang 14 anyos nga si Brenmar Bramal, human sa insidente.
Una niini, nasayran nga samtang nagtambay ang biktima kauban ang iyang grupo sa mga kabatan-unan miaging gabii, miagi ang nag-inusarang suspek kung asa ilang gihagit kini ug sumbaganay hinungdan nga midagan kini ug nanawag sa iyang grupo.
Dihang nakit-an sa grupo sa biktima ang grupo sa suspek nga daghan kaayo, misulay sila ug dagan palayo apan gigukod sila ug si Llames ang maoy naabtan ug gitigbas.
Samtang sa pagresponde sa kapulisan gikan sa Pendatun Police Station, nakadagan ang mga suspek ug bugtong ang duha ka menor de edad ang maoy nadakpan ug gidala sa presinto.
Sa pagkakaron giturn-over una sa CSWDO ang duha ka mga batan-on samtang padayong gipangita ang uban pa nilang mga kauban nga nakasibat.
Kahibaluan nga gikabutyag nga mga estudyante sa usa ka pampublikong tulunghaan sa dakbayan ang mga suspek.
