GENERAL SANTOS CITY – Padayong gimonitor sa City Disaster Risk Reduction and Management Office ug Office of the Civil Defense-12 ang Silway River dinhi sa dakbayan.
Matud ni Jorin Mae Balmediano, tigpamaba sa OCD-12, matag karon ug unya gakuha sila ug update gikan sa sitwasyon sa lugar, hilabi na sa mga residente nga nagpuyo duol sa tulay.
Nasayran nga base sa nadawat nilang mga thunderstorm advisories, gilauman na gayud una pa man ang mga pag-ulan-ulan sa South Cotabato ug mga kasikbit nga lugar, hinungdan nga padayon usab matud pa sila sa paghatag ug advisory ug pahimangno sa mga residente nga posibleng maapektuhan.
Nasayran nga sa nakalabay’ng mga adlaw, nakasinati ug mga pagbaha ang Tupi, South Cotabato ug GenSan nga una nang gikabutyag nga ang tubig ang gikan sa kabukiran sa Polomolok.
Tungod niini, dinhi sa siyudad, 10 ka pamilya ang nahimong apektado ug nanghikling gikan sa Brgy City Heights, samtang 47 sa Brgy Labangal apan wala na nanghikling gumikan dili ingon kadako ang nasinatiang pagbaha.
Sa pagkakaron naka-white alert matud pa dinhi sa dakbayan, kung asa wala nay mga dagko nga ulan nga gilauman, apan posible gihapon matud pang makasinati ug mga ginagmay hangtod sa kasarangan nga pag-ulan, butang nga posible pa gihapong mag-usab-usab, hinungdan nga giawhag ang tanan nga mahimong alerto sa kanunay.
