GENERAL SANTOS CITY – Nahimong hapsay ug malipayon ang bag-uhay lamang natapos nga pagsaulog sa dakbayan ug 78th Founding Anniversary ug 28th Kalilangan.
Kini ang gibutyag ni Police Superintendent Lauro Espida, tigpamaba sa General Santos City Police Office.
Sumala pa nga kamatikdan gayud nga nagtinabangay ang tanan sa pagbantay sa seguridad ingon man alang sa kahapsay sa palibot hinungdan nga walay dagko nga panghitabo ang natala.
Sa Oval Plaza, gawas matud pa sa daghang mga lighters, wala matud pay mga armas o mahait nga hinagiban ang nakumpiska sa mga force multipliers, nga posibleng gumikan matag tuig nang gipatuman ang pagbawal sa mga gibawal nga butang sulod sa Oval Plaza matag may delebrasyon sama sa Kalilangan ug Tuna Festival.
Sagad lamang usab matud pa sa ilang natala mao ang pipila ka gagmay’ng kasamok hilabi na sa mga menor de edad ug mga batan-on nga miapil sa mga pa-disco sa kalye, apan gilayon usab matud pa nilang nabadlong ug napahapsay.
Gidayeg usab ni Superintendent Espida ang nagpadagan sa tasking sa Kalilangan 2017, kung asa alang kaniya kini matud pa ang labing nindot.
Sukwahi sa nakalabay’ng tuig, mas plansado matud pa ang pagpadagan sa kasaulugan, kung asa han-ay matud pa ang tasking, kumpleto ang pagkaon sa mga force ug security mutlipliers.
