GENERAL SANTOS CITY – Giawhag ni Lt. Daryl Cansancio, tigpamaba sa 73rd Infantry Battalion Philippine Army nga ipadangat sa korte ang unsa mang akusasyon nga gibato batok sa kasundalohan.
Ang pahayag sa opisyal, human mireklamo ug nagpatabang sa Gabriela ang mga misis sa walo ka NPA nga nabalhog karon sa Alabel Municipal Police Station kon asa hugtanong gibutyag nga dili mga sakop sa nasampit nga rebeldeng grupo ang ilang mga bana og may natigayong harassment sa mga residente sa gipahigayong operasyon sa militar.
Matud ni Lt. Cansancio, andam silang tubagon ang alegasyon sa mga nasampit kung asa didto sa korte ang pinakahustong venue aronn mapamatud-an kung asa kanila ang nagsulti og kamatuoran.
Gihingusgan ni Lt. Cansancio, nga dili na bag-o alang sa militar ang mga alegasyon susama sa mga gireklamo karon sa mga kabanay sa mga miyembro sa NPA nga nasikop sa Datal Anggas, Alabel sa miaging semana.
Matud pa, susamang reklamo ug akusasyon kanunay ang ilang madunggan matag may mga masikop nga mga rebelde, ug ilaha matud pa kining girespeto.
Samtang,gibutyag ni Cansancio nga andam usab matud pa ang militar nga makigtambayayong sa Gabriela sa pag-imbestiga sa nasampit nga reklamo, aron mapagawas ang kamatuoran.
