GENERAL SANTOS CITY – Gibanabanaang mukabat sa 95 porsyento sa mga empleyado sa GenSan City Hall ang apektado sa pagpasirado ug pagpahunong sa operasyon sa KAPA Community Ministry International Inc.
Kini mismo ang gibutyag ni Mayor Ronnel Rivera sa pakighinabi sa Bombo Radyo GenSan atol sa pagtambong niini sa sesyon, Martes, sa Sangguniang Panlungsod.
Matud sa mayor, adunay gimugnang technical working group nga mututok sa mga empleyado nga nabiktima sa KAPA ug apil ang mga residente sa siyudad nga mangayo’g tabang.
Ang grupo sa pagpanguna ni Vicky Magante, labaw sa City Social Welfare and Development Office kauban ang uban department head ug partner NGO’s ang maghatag ug counselling ug uban pa.
Dugang pa sa mayor, nasabtan niining ‘in denial stage’ pa ang KAPA members sa nahitabo apan galaum si Mayor Rivera nga dili madugay mupatim-aw ang mga biktima ug daghan sa ilaha ang magpasang-at ug reklamo sa mga otoridad batok sa KAPA.
Hinuon ang gustong mahitabo ni Mayor Rivera nga mabalik sa mga nasampit ang hinaguang salapi bisan nga kaniadto pa wala sila magkulang sa pagpahinumdum nga dili musulay sa pagbutang ug salapi sa maong investment scheme.
