Gipahamtang sa National Police Commission (NAPOLCOM) ang 90 ka adlaw nga preventive suspension batok kang Police Brigadier General Romeo Macapaz Jr., ang bag-ong director sa Police Regional Office 12 (PRO-12).
Sumala sa NAPOLCOM, ang desisyon migikan sa reklamo nga gisang-at ni Elakim Patidongan nga naghisgot sa giingong pagdakop ug pagpabalik kanila gikan sa Cambodia. Sa imbestigasyon, nakita sa komisyon nga adunay lig-on nga basehan ang mga pasangil, hinungdan nga gipasakaan si Macapaz og preventive suspension.
Gipasabot ni NAPOLCOM Vice Chairperson Atty. Alberto Bernardo Calinisan nga dili kini silot apan usa ka preventive measure aron malikayan ang posibilidad nga maapektuhan o matamper ang mga ebidensiya ug testimonya nga gisumite sa kaso.
Matod pa sa komisyon, temporaryong ipapuwesto si Macapaz sa usa ka holding unit sa Camp Crame sulod sa tulo ka buwan samtang nagpadayon ang pormal nga deliberasyon sa kaso.
Klaro usab nga makadawat lang siya og pinal nga silot kung mapamatud-an nga siya nakalapas, human sa review nga buhaton sa NAPOLCOM en banc.
Kahinumduman nga ang pamilya Patidongan misang-at sa ilang reklamo batok kang Macapaz, diin giingong gikuha niini ang ilang personal nga cellphone nga adunay sulod nga ebidensiya may kalabotan sa kontrobersyal nga kaso sa mga nawalang “sabungeros.”
Sa laing bahin, nagpahayag ang kampo ni Macapaz nga andam silang moatubang ug motubag sa NAPOLCOM aron klaruhon ug ipaningkamot nga mapasipala ang mga pasangil batok sa opisyal nga karon giila isip bag-ong pangulo sa PRO-12.
