GENERAL SANTOS CITY – Mas milagsik pa ang pagserbsiyo sa mga sakop sa Barangay COVID Control Force human nahatag ang ilang honorarium.
Kini human gikumpirma ni James Abando sa City Mayors Office nga siyam ka barangay sa syudad ang nakakuha na sa ilang honorarium.
Kini human nakompleto ang gipangayo nga mga rekosito. Sugod sa nakalabay nga semana nadawat na sa mga sakop sa mga BCCF sa barangay Calumpang, barangay Tinagacan, barangay Sinawal, barangay Conel ug barangay Olympog.
Samtang una na nga nakadawat sa ilang honorarium ang mga BCCF sa Baluan, barangay Buayan, barangay Katangawan ug barangay Ligaya.
Human sa siyam ka barangay isunod usab ang uban pang barangay nga nakasumite sa ilang mga papeles sa City Accounting Office.
Kahibaluan nga nahimong isyu ang honorarium sa mga BCCF gumikan sa pipila ka bulan nga nagpaabut hinungdan nga gibate ug kaluya ang uban gumikan sa kalibog sa isumite nga papeles ngadto sa City Hall.