GENERAL SANTOS CITY – Gipanganlan na sa 73rd ug 39th IB Philippine Army ang duha ka NPA members nga napatay sa nahitabong engkwentro sa Sitio Datal Pitak, Brgy Colonsabak, Matanao, Davao del Sur, kaniadtong Lunes sa buntag, Mayo 29.
Giila ang mga nasampit nga silang Argienil Catan alyas Dodong, 23-anyos nga residente sa Purok 3, New Baguio, Makilala, ug Jovane Tiwaro alyas Jan-jan, 29, taga Sitio Kaglom, Brgy Kimlawis, Kiblawan.
Kahinumduman nga narekober kauban sa patay’ng lawas sa duruha ang usa ka M14 rifle ug M4 Bushmaster firearms.
Una nang gibutyag ni Lt. Daryl Cansancio, tigpamaba sa 73rd IB, nga ang duruha ang gikan sa Guerrilla Front 72 sa Far South Mindanao Regional Command, nga responsable sa pagsunog sa usa ka 10-wheeler delivery truck nga may dala nga 524 sako sa bugas sa Matanao kaniadtong May 16.
Kahinumduman nga sa nahisgutang engkwentro, usa ang nasamdan sa tropa sa gobyerno, nga giilang si Cpl Lovinder John Labantes sa 39th IB.
Kasamtangan pang nagpatambal ang nasampit nga sundalo samtang nagpadayon ang pursuit operation sa hiniusang pwersa sa 7rd ug 39th IB nbatok sa nahisgutang mga rebelde.
Samtang, gilayong na-turn over sa ilang tagsa ka pamilya ang patay’ng lawas sa duha ka rebelde, sa tabang sa lokal nga panggamhanan sa Matanao.
