Hangtud 19 ka bagyo ang posibleng mamugna o musulod sa Philippine Area of Responsibility (PAR) sa wala pa matapos ang tuig 2025.
Matud ni weather specialist Joey Figuracion, gilauman nga adunay 2 hangtud 3 ka bagyo matag bulan gikan Hulyo hangtud Nobyembre, ug 1 hangtud 2 ka bagyo sa Disyembre.
Ang Tropical Depression Auring pa lamang ang nakasulod sa PAR karong tuiga, apan kini dayong natunaw.
Nagpasidaan si Figuracion nga taas ang posibilidad nga mag-landfall ang mga musunod nga bagyo.
Bisan pa og dili kini muigo sa yuta, posible gihapon kini nga makapalig-on sa habagat, ilabi na sa mga bulan sa Hulyo hangtud Oktubre.
Kasagaran, ang mga bagyo sa Hulyo mutahak paingon sa Taiwan o Japan, o sa taas nga bahin sa amihanang Luzon paingon sa China, o mutabok sa sentral ug amihanang Luzon padulong Vietnam.
