Positibo ang reaksyon ni kanhing Senador Antonio Trillanes IV human gikumpirma na sa Anti-Money Laundering Council (AMLC) ang iyang mga rebelasyon.
Human sa iyang pag-apil sa ikatulong pagdungog sa House Justice Committee kabahin sa ‘impeachment’ batok kang Vice President Sara Duterte, gibutyag niya ang iyang kalipay nga napamatud-an na ang iyang mga gipahayag.
‘I feel relieved’, matod pa niya, human mismong gikumpirma sa Anti-Money Laundering Council ang iyang gipagawas nga impormasyon kabahin sa mga transaksyon sa pamilya Duterte sa bangko.
Bisan pa niini, miangkon siya nga nasubo siya nga miabot pa og napulo ka tuig una pa migawas ang kamatuoran kabahin sa 18 ka transaksyon sa mga Duterte sa bangko nga nagkantidad og minilyon ka piso.
Nagalaum ang kanhing magbabalaod nga magpadayon ang pagdungog sa ‘impeachment’ aron, matangtang na ang giingong pagpakaaron-ingnon sa pamilya Duterte.
Direkta niyang giingon nga ang ilang mga kwarta gikan sa ilegal nga droga, maong iyang gihangyo ang publiko nga magmata sa mga rebelasyon nga karon gikumpirma na.
Dugang pa niini, gihangyo usab niya ang publiko nga saligan siya sa mga impormasyong iyang nadiskobrehan ug gipadayag sa katawhan.
Gipunting niya nga ang mga rebelasyon dili imbento o hinimo-himong mga istorya lamang.
Sa laing bahin, mitubag si Vice President Sara Duterte nga limpyo ang iyang ‘service record’ ug wala siya nagka-problema o kaso kabahin sa paggamit sa pondo sa gobyerno.
