GENSAN – Malinawon nga nahuman ang White Sunday Event sa General Santos City, kabahin sa Trillion Peso March, nga gisalmotan sa liboan ka katawhan, labi na ang mga kabatan-onan ug estudyante gikan sa nagkadaiyang kolehiyo ug unibersidad sa dakbayan.
Sumala kang Bro. Manuel De Leon, FMS, president sa Notre Dame of Dadiangas University ug usa sa mga nangulo sa kalihokan, ang maong event importante aron mapalambo ang panaghiusa sa komunidad ug mapalig-on ang civic engagement sa kabatan-onan, kay kon magkahiusa ang tanan, mas dali makab-ot ang kalinaw ug pag-uswag sa nasud.
Ang kalihokan naglakip sa street march, programa sa entablado, ug uban pang aktibidad nga nagtugot sa mga kabatan-onan nga ipadayag ang ilang opinyon ug hangyo alang sa hustisya, transparency, ug integridad sa gobyerno.
Naglaum ang mga partisipante nga madungog sa gobyerno ang ilang mga tingog ug unta undangan na ang korapsyon sa nasud, samtang nagpangayo usab sila sa suporta sa lokal nga administrasyon ug mga ahensya aron masiguro ang tinuod nga accountability sa tanan nga proyekto sa dakbayan ug sa nasud.
