GENSAN- Gipahayag ni Nane Danlag, ang Officer-in-Charge sa PHIVOLCS-General Santos, nga walay aktibong fault line sa sulod mismo sa siyudad sa Gensan ug sa lungsod sa Glan, Sarangani.
Sumala kaniya, ang grabe nga mga liki sa yuta ug kadaot sa mga istruktura ug kalsada human sa kusog nga magnitude 7.8 nga linog resulta sa gitawag nga “liquefaction” ug “lateral spreading.”
Kini nga phenomenon kasagarang mahitabo sa mga dapit nga duol sa katubigan, sama sa mga suba ug coastal barangays, diin humok ang komposisyon sa yuta tungod sa presensya sa tubig.
Giklaro ni Danlag nga ang mismong gigikanan sa maong kusog nga pag-uyog mao ang paglihok sa Cotabato Trench nga nahimutang sa lawod sa dagat.
Tungod niini, grabeng naapektuhan ang mga dapit sa Glan, Malapatan, ug Gensan nga nakasinati og Intensity VIII nga pag-uyog.
Busa, gipasalig sa PHIVOLCS nga dili bag-ong fault line ang hinungdan sa mga liki kondili ang kinaiyahan sa yuta nga daling mohumok kung maigo sa kusog nga kalamidad.
