Usa ka warrant of seizure and detention (WSD) ang gi-isyu niadtong Martes, Agosto 25, batok sa usa ka Porsche supercar nga narehistro sa ngalan sa aktor nga si Derek Ramsay.
Sumala sa Bureau of Customs (BOC)-Office of the Commissioner Deputy Chief of Staff Chris Noel Bendijo, si Manila International Container Port Collector Felipe Geoffrey De Vera IV ang nag-isyu sa WSD batok sa luxury vehicle.
Si Bendijo miingon nga ang BOC ang mopatuman sa warrant ug personal nga mohatud niini kang Ramsay.
Kung madawat na sa aktor ang WSD, gikataho nga hatagan siya og 15 ka adlaw aron mosumiter og mga dokumento nga nagpamatuod nga walay mga iregularidad sa mga duties ug taxes nga gibayad sa sakyanan.
Kung dili makasumiter si Ramsay og igong mga dokumento, ang BOC moisyu og forfeiture order.
Kung mahimong final na ang order, ang sakyanan mahimong i-auction ug ang kita niini moadto sa pundo sa gobyerno.
Sumala sa rekord sa Customs, ang sakyanan nga misulod sa nasud niadtong 2021 usa ka Porsche 918 Spyder apan ang mga dokumento nagreport niini isip usa ka Porsche Boxster.
Ang sakyanan gibanabana nga mobalor og P48.02 milyon apan ang kantidad nga gideklarar sa Customs kay P3.26 milyon lang.
Usa ka dakong kalainan sa buhis ang mitumaw usab, diin P1.8 milyon lang kuno ang nabayran, nga unta P32 milyon.
Samtang, ang BOC miingon nga ilang imbestigahan usab ang mga personahe sa ahensya nga nagproseso sa mga dokumento sa pagsulod sa luhong sakyanan aron mahibal-an kung sila ba ang manubag.
