Anaa na usab sa taas nga rekord ang soberanya nga utang sa Pilipinas kaniadtong Hulyo 30, 2024 ,samtang ang gobyerno sa Pilipinas nagpadayon sa pagpangutang aron pondohan ang budget alang sa mga programa ug proyekto.
Kini base sa datos nga gipagawas sa Bureau of the Treasury.
Matod sa ahensya, niulbo kini ngadto sa P15.689 trilyon nga katumbas sa 1.3% nga usbaw gikan sa P15.483 trilyon nga outstanding nga utang nga natala sa katapusan sa Hunyo sa samang tuig.
Gipasabot pa niini nga ang P206.49-billion month-on-month increase sa utang sa nasud tungod usab sa net issuance sa internal ug external nga utang.
Matod sa ekonomista nga si Michael Ricafort, ang padayong pagsaka sa inflation maoy hinungdan nga nagkataas ang paggasto sa gobyerno.
Gawas niini, taas sab ang interest samtang nihinay og gamay ang exchange rate sa peso sukad niadtong 2022 hinungdan nga nitaas ang gasto sa pagbayad sa utang.
Una nang niingon si Finance Secretary Ralph Recto nga mahimong moabot og P20 trilyon ang utang sa Pilipinas sa pagtapos sa termino sa PBBM sa 2028.
Nagtuo ang kalihim nga ang pag-uswag sa ekonomiya sa nasud labaw pa sa kinatibuk-ang kantidad sa utang sa gobyerno.
