Nagpadayon ang sunod-sunod nga pag-atake sa militar sa Estados Unidos batok sa Iran, nga miabot na sa ika-13 nga sunod-sunod nga gabii.
Sumala sa Iranian state media, upat ang namatay ug lima ang nasamdan sa pinakabag-o nga airstrikes nga miigo sa mga pasilidad sa militar ug komersyal sa Bandar Abbas ug Qeshm Island sa Iran.
Gipahayag ni US President Donald Trump nga gamiton sa Washington ang mga gi-freeze nga kabtangan sa Iran aron ibayad sa bisan unsang kadaot sa mga barko, kargamento, ug uban pang operasyon nga may kalabotan niini.
Gitawag ni Trump ang maong lakang nga patas ug makiangayon, apan gisaway kini ni Iranian Foreign Minister Abbas Araghchi ug giingong usa kini ka “delikadong precedent.”
Matud sa US Central Command, target sa ilang operasyon ang mga sentro sa komand sa militar sa Iran, mga pasilidad sa pagtipig og drone, communication networks, coastal surveillance sites, ug maritime capabilities aron mapaluya ang abilidad sa Iran sa pagpanghulga sa mga sibilyang barko sa rehiyon.
Samtang, misamot ang kabalaka human giatake sa mga Houthi nga suportado sa Iran ang duha ka Saudi tanker sa Red Sea, nga maoy hinungdan sa pagsaka sa presyo sa lana ngadto sa kapin 100 ka dolyar kada bariles—ang pinakataas sukad Mayo.
Nasayran usab nga usa lamang ka tanker ang nakalusot sa Strait of Hormuz ning Hulyo 24, ang pinakagamay nga gidaghanon sukad Mayo 7, nga nagpakita sa dakong epekto sa tensyon sa pangkalibutang patigayon.
