Patay ang usa ka lalaki human gitiro kini sa wala mailhing susptesado kaganihang alas 4:00 sa hapon, Abril 26, 2025 sa Purok Paradise, Brgy. Tambler, ning dakbayan sa Heneral Santos.
Giila sa Tambler Police Station ang biktima nga si Isagani Toto Indab, 42 anyos, minyo ug temporaryong nagpuyo sa maong lugar. Samtang ang suspek ang nagpabilin pang ginaila sa kapulisan ingon man ang motibo sa pagpamusil.
Sa inisyal nga imbestigasyon gipahibalo ang nasampit nga buhatan nga adunay natigayon nga pagpamusil sa Purok Paradise, Brgy. Tambler, ning dakbayan. Gilayon nga gi respondihan kini sa mga awtoridad ug didto ilang nasayran ang biktima nga nag buy-od, nagkaligo sa kaugalingong dugo ug wala nay kinabuhi gumikan sa naangkon niini nga samad pinusilan sa ulo.
Sumala pa sa ig-agaw sa biktima nga nag inusara ra nga nagpuyo si Indab sa maong panimalay sa pipila ka mga adlaw human kining nakalaya sa Lanton General Santos City Jail sa kasong may kalabutan sa ilegal nga droga.
Sa kasamtangan nagpadayon ang imbestigasyon sa kapulisan sa Police Station 5 ingon man dragnet operation.
