GENERAL SANTOS CITY – Kustodiya karon sa kapulisan og balhog sa selda ang usa ka babaye nga person of interest sa pagpamomba atubang sa lying in sa Prk. Malipayon, Brgy. Apopong ning dakbayan miaging tuig nga gikaangol sa walo ka biktima.
Pinasubay sa warrant of arrest alang sa Frustrated Murder pirmado ni Hon Judge Dennis A. Velasco sa Regional Trial Court 11th Judicial Region Br. 23, GenSan, gidakop ang nagpangalan og Baina Sahak, 20, minyo og residente sa Purok View, Barangay Tambler, kagahapon alas 11:30 sa buntag.
Matud sa hepe sa Makar Police Station nga si PMaj Ananias Vasquez, usa matud pa si Baina sa mga gikasuhan kalabutan sa IED Explosion sa Bonita Lying In Center sa National highway, Barangay Apopong, niadtong September 16,2018.
Nasayran nga bana matud pa ni Baina si Bassir Sahak nga leader matud pa sa special operation group sa ISIS inspired terror group nga Ansar al Khilafa Philippines nga gipamunuan kanaidto ni Tukboy Maguid nga napatay sa police operation sa Kiamba, Sarangani niadtong Enero 2017. Niadtong October 2018, napatay usab sa police operation sa Barangay Daliao sa Maasim si Bassir.
Andam matud pa si Baina nga pamatud-an sa korte nga wala sila nalambigit sa iyang bana sa pagpamomba.
Mukabat sa P300,000.00 ang girekomendang piyansa sa kada kaso ni Baina alang sa temporaryo niining kagawasan.
Kahibaluan nga kapin pa sa napulo ang ‘at large’ karon nga gitudlong nalambigit sa pagpamomba.
