“Dili kasaligan ang mga imbestigasyon sa Senado ug Kongreso kabahin sa mga isyu sa korapsyon, ilabi na sa mga proyektong nalambigit ang Department of Public Works and Highways (DPWH).”
Mao kini ang gibutyag ni Atty. Rey Cartojano usa ka abogadong ning syudad sa Gensan, matod pa niya ang mga pagdungog sa Senado ug Kongreso sama ra sa usa ka “circus”, diin ang mga opisyal nga gitugyanan sa pag-imbestiga mao ra gihapon ang posible nga nalambigit sa mga anomalya.
Mas gitutokan karon ni Atty. Cartojano ang gihimong imbestigasyon sa Independent Commission for Infrastructure nga diin giingon niya nga daghan na ang mga anaa sa Department of Public Works and Highways (DPWH) Engineers ang “nikanta” ug gibutyag na ang ilang mga nahibaw-an kabahin sa mga transaksyon sa mga senador, kongresista, ug uban pang opisyal sa gobyerno.
Gani isip usa ka taxpayers nanghinaot na lamang kini nga mahibaw-an kinsa ang mga nalambigit niining mga kurapsyon ug mapasakaan ug igong kaso.
