Nagkapuliki na ang mga Senador sa Estados Unidos ning mga taknaa arun debatehan ang kontrobersyal nga dul-an usa ka-libo ka palid nga budget bill ni U.S. President Donald Trump nga mao ang “One Big Beatiful Bill”.
Kini pinaagi sa”vote-a-rama”, kon back-to-back voting session sa mga Senador sa budget debate, kansa kasagarang molungtad og 20 ka oras.
Sa maong debate, dunay unlimited power ang mga magbabalaod sa pag-amyenda sa nasangpit nga sugyot balaodnon.
Nahimong kontrobersyal ang maong bill, ilabi na alang sa mga Democrats, human nga kunhuran niini ang health care sa mga US Citizens lakip na sa mga low-income Americans.
Nameligro usab kining dili makapasar tungod kay pipila ka mga Republicans ang dili man usab uyon niini.
Una nang nakab-ot sa US Senate ang 51-49 nga boto aron sugdan ang debate.
Duha sa mga wala mi-uyon mao ang mga Republican Senators, kansa mga kaalyado sa Presidente.
Lakip sa unod sa maong sugyot balaodnon mao nga kunhuran ang buhis ngadto sa $3.8 trillion pinaagi sa tax breaks, kunhoran ang pondo sa mga welfare program sa US sama sa Medicaid, kon ang healthcare program para sa mga Americans ug tugotan usab ang panggamhanan nga mo-utang ngadto na sa $5 trillion.
Gilaumang mahuman ang botohan karong adlawa, Hunyo 30 sa US.
Nasayrang kinahanglan lamang og tulo pataas nga mga Republican Senators nga dili mobotar sa maong bill aron dili kini makapasar, gawas na lamang kung mag mag-tie ang boto sa Republicans ug Democrats, kansa kinahanglang botaran ni Vice President JD Vance alang sa tie breaker.
