Usa ka resolusyon karon ang gisang-at sa Senado nga nag-awhag kang Senador Ronald ‘Bato’ dela Rosa nga boluntaryong mosurender sa mga awtoridad ug moatubang sa hustong proseso sa balaod kalabot sa warrant of arrest nga gipagawas batok kaniya sa International Criminal Court.
Ang Senate Resolution No. 395 gisang-at nila Senador Francis ‘Kiko’ Pangilinan, Vicente ‘Tito’ Sotto III, Panfilo Lacson, Risa Hontiveros, ug Bam Aquino samtang nagpabilin si dela Rosa sa Senado ubos sa protective custody.
Niadtong Lunes, gibutang si dela Rosa sa protective custody sa Senado ubos sa bag-ong liderato ni Senate President Alan Peter Cayetano.
Sa resolusyon, giingon sa mga senador nga bisan pa man adunay mga gahum ug pribilehiyo ang Labing Halangdong Kapulungan sa Kongreso ubos sa Konstitusyon, wala kini nagtugot sa Senado nga mahimong santuwaryo o mohatag og immunity batok sa pagdakop sa bisan kinsang miyembro niini.
Gipasabot usab nila nga ang bugtong immunity nga gihatag sa Konstitusyon ngadto sa mga senador limitado lamang sa mga kaso nga adunay silot nga dili molapas og unom ka tuig nga pagkabilanggo samtang nagasesyon ang Kongreso.
Dugang pa nila, walay probisyon sa Konstitusyon o sa Senate Rules nga naghatag og gahum sa Senado aron mohatag og “protective custody,” institutional refuge, o immunity batok sa lawful arrest o surrender process.
Gipasiugda usab sa mga senador nga sa nangaging mga kaso nga naglambigit sa mga kanhing senador sama nila Juan Ponce Enrile, Leila de Lima, ug Antonio Trillanes IV, gitahod sa Senado ang judicial process.
Tumong usab sa resolusyon nga pahinumdoman nga walay constitutional o statutory authority ang Senado aron mohatag og proteksyon batok sa lawful arrest o judicial proceedings.
