GENERAL SANTOS CITY – Padayon pa nga giimbestigahan sa kapulisan ang natigayon nga pagpamusil sa tulo ka managlahing lugar sa Kalamansig, Sultan Kudarat nga tulo ka biktima ang namatay.
Matud pa kang PLt. Sammy Clarito, Deputy Station Commander sa Kalamansig Police Station, unang girespondihan ang pagpamusil kang Barangay Kagawad Canido Byuri, 41, minyo nga residente sa Datu Wasay.
Anaa lang sa balay ang biktima og dihang adunay nituktok migawas kini apan sa paggawas gilayon nga gipusil sa armadong kalalakihan.
Nakaangkon og daghang samad sa nagkadaiyang parte sa lawas hinungdan sa hinanali niining kamatayon.
Ang lain pang duha ka biktima sa pagpamusil giila nga si David Tanderado, 50 anyos og Tiorandy Borja, 52 anyos, usa ka mag-uuma nga pulos residente sa Sitio Secret Valley, Barangay Datu Wasay, Kalamansig Sultan Kudarat.
Dihang nagbaktas ang mga biktima paingon sa ilang umahan nakasugat ang mga armadong kalalakihan.
Gipangayuan ang duha og salapi apan dihang gisultihan ang mga suspek nga walay ikahatag didto na gipamusil ang mga biktima.
