Gihangyo sa transport sector sa dakbayan sa Heneral Santos ang lokal nga panggamhanan sa paghatag og subsidiya human ni-usbaw ang presyo sa lana sa global market tungod sa kagubot sa Middle East.
Matud ni City Councilor Dominador Lagare, chairman sa komitiba sa transportasyon sa Sangguniang Panlungsod sa Gensan, padayon pa nga nangita og pondo ang lokal nga panggamhanan aron matuman ang planong pinansiyal nga ayuda alang sa mga drayber nga unang naapektuhan sa pagsaka sa presyo sa produktong petrolyo.
Gipahibalo sa Department of Social Welfare and Development (DSWD) national nga ang mga tricycle driver makadawat og lima ka libong piso isip pinansiyal nga ayuda ilawom sa Assistance to Individuals in Crisis Situation (AICS) program.
Samtang nagpadayon ang pagproseso, gihimo ang profiling sa mga franchise holder sa nagkalain-laing barangay sa syudad aron malikom ang opisyal nga masterlist sa lokal nga panggamhanan, nga magsilbing basihan sa pag-apod-apod sa maong ayuda.
