Miangkon ang testigo sa prosekusyon nga si Xylene Del Campo nga base sa iyang kaugalingong interpretasyon, kinahanglan adunay “madakpan” isip pamatuod sa kalampusan aron mahimong basehan sa pagbayad og rewards gikan sa confidential fund.
Kini ang tubag sa testigo sa pangutana ni Presiding Officer Francis Escudero kung kaugalingon ba niyang interpretasyon ug wala kini gilatid sa Joint Circular nga kinahanglan adunay madakpan alang sa payment of rewards.
Ang gipasabot nga circular ni Escudero mao ang Joint Circular 2015-01, nga nagsilbing opisyal nga giya sa paggasto ug pag-audit sa Confidential ug Intelligence Fund sa gobyerno.
Gipasabot usab ni Del Campo nga ang iyang basehan mao ang ubang mga dokumento nga iyang na-audit kaniadto, diin adunay gilakip nga dokumento sa payment of rewards nga nagpakita nga adunay nadakpan.
Gipangutana ni Escudero ang testigo kung nahibalo ba siya nga mao usab kini ang sumbanan nga gigamit sa mga miaging auditor.
Mitubag si Del Campo nga pareho silang nagbase sa Joint Circular isip sumbanan sa ilang pag-audit.
Apan gipasiugda ni Escudero nga wala man kini sa Joint Circular ug gipangutana kung kaugalingong interpretasyon ni Del Campo ug sa mga miaging auditor ang maong sumbanan.
Mitubag si Del Campo nga iyang kaugalingong interpretasyon kini.
Gipasabot usab sa testigo ang kalainan tali sa payment of rewards ug purchase of information. Matud niya, mahimong isipon nga purchase of information kung walay nahitabo nga dili maayong insidente, samtang alang sa payment of rewards, kinahanglan adunay nadakpan isip pamatuod sa kalampusan.
Sa dihang gipangutana siya ni Defense Counsel Atty. Kristine Ferrer kung bawal ba ang paghatag og tip bisan walay nahitabong dili maayong insidente tungod kay napugngan kini pinaagi sa confidential information, gisupak kini ni Prosecution Counsel Atty. Lorna Kapunan.
Matud ni Kapunan, makapahisalaag ang pangutana sa depensa tungod kay gisagol niini ang payment of rewards ug payment for information.
Gipunto ni Kapunan nga dili ang payment for information ang gi-disallow sa Commission on Audit o COA, kondili ang gipangayo nga dokumento mao ang proof of success alang sa payment of rewards.
Sa dihang gipangutana ni Escudero ang testigo kung ang paghatag og impormasyon bahin sa hulga batok sa bise presidente, bisan walay aktuwal nga hulga nga nahitabo, mahimong iklasipika isip reward, mitubag si Del Campo nga information kini.
