Gimanduan ni Department of National Defense (DND) Secretary Gilberto Teodoro ang Armed Forces of the Philippines (AFP) sa pagsiguro nga luwas ug malinawon ang pagpahigayon sa parliamentary elections sunod bulan.
Matod ni Teodoro, kinahanglang mamentina ang integridad sa matag ranggo sa militar ug walay bisan kinsa nga sakop sa tropa ang malambigit sa partisan politics sa umaabot nga piniliay sa Oktubre.
Matod niya kinahanglang mo patigbabaw ang tingog sa katawhang Pilipino sa pagpili sa ilang mga lider ug ang trabaho sa AFP mao ang pagsiguro nga malinawon ug may kredibilidad ang madungog niini.
Gipasiugda usab sa kalihim nga ang yawe sa malinawon nga eleksyon sa Bangsamoro Autonomous Region in Muslim Mindanao (BARMM) mao ang kaandam sa tropa sa Armed Forces isip peace advocates sa nasangpit nga eleksyon.
Samtang, ang command conference nga gipahigayon kaniadtong Sabado dili lang kabahin sa pagpangandam sa AFP ug DND alang sa parliamentary elections kondili sa uban pang mga inisyatiba sa organisasyon aron mahatagan og hingpit nga suporta ang BARMM.
