Gikumpirma sa Grammy Award-winning singer nga si Sam Smith nga opisyal na silang engaged sa fashion designer nga si Christian Cowan. Gibutyag ni Smith ang maong balita atol sa usa ka interbyu.
Matud ni Smith, ang kanta nga “Everlasting Love,” nga maoy unang track sa ilang umaabot nga album nga “Hazel Eyes,” gisulat sa gabii sa wala pa ang ilang unang panagkita ni Cowan.
Nahuman ang kanta samtang nagkalalom ang ilang relasyon. Dugang pa ni Smith, ang maong album mao ang unang higayon nga nakasulat sila og mga kanta nga naghisgot sa gugma nga gitubag usab sa ilang kapikas.
Atol sa usa ka sold-out nga konsiyerto sa San Francisco, gihulagway nila ang album isip pagsaulog sa usa ka queer nga relasyon.
Kahinumduman nga niadtong 2019, mipahibalo si Smith nga sila non-binary ug naggamit sa pronouns nga they/them.
Nagsugod ang mga espekulasyon bahin sa relasyon nila ni Cowan niadtong Disyembre 2022 human sila makita nga kanunayng mag-uban sa nagkalain-laing mga kalihokan.
Niadtong Mayo, migawas usab ang mga report nga nadunggan ang magtiayon nga naghisgot na sa ilang engagement sa wala pa sila motambong sa Met Gala sa Mark Hotel.
