SARANGANI PROVINCE – Padayon ang manhunt operation alang sa posibleng pagkaaresto sa mga suspek nga misulod sa usa ka balay sa Purok 2, Sitio Basak, Barangay Malandag, Malungon, Sarangani Province.
Nasayran nga daghang butang ang natangag sa mga responsable nga padayon pang giila sa kapulisan.
Nakadawat ug tawag ang Malungon Municipal Police Station kalabot sa insidente nga ilaha gilayong girespondihan ug sa pag-abot sa lugar gidala sa ospital ang mga biktima nga silang Ramonito T. Secreto, 54 anyos, kansa manager sa Sarangani Vegetable Seed Growers Multi-Purpose Cooperative (SAVESEGROW-MPC), ug Jovy Masalon, 50 anyos.
Sa imbestigasyon, nakasulod ang mga suspek sa balay agi sa pansayan nga naa sa likod nga bahin human nga ilang gitangtang ang jalosie.
Gawas sa duha, may lain pa silang tulo ka kauban gilangkoban sa usa ka bata ug edaran kung asa gibugkusan ug packaging tape ang ilang mga kamot sa sulod sa usa ka lawak.
Misulay sa pagsukol si Ramonito dihang gipangita sa mga suspek kung asa nabutang ang mga kuwarta hinungdan nga gidunggab nga naigo sa iyang wala nga abaga.
Gitangag sa mga suspek ang usa ka unit sa Ford Raptor nga may plaka nga MAR 5997, color gray, 2 ka iPad , 4 ka mahalong cellphone, mahalon nga relo, lakip pa ang graduation ball ring, wala matino nga kantidad sa salapi ug mga alahas kung asa ang direksyon ang paingon sa Gensan.
Padayon ang gihimong koordinasyon sa kapulisan sa uban pang law enforcement agencies ug local police stations samtang gipakusog ang intel monitoring aron mailhan ang mga suspek.
