Gibutyag sa social media influencer ug aktres nga si Inka Magnaye nga nawad-an og ‘voice-over job’ ang iyang inahan human gipulihan kini sa ‘artificial intelligence’ o AI.
Sa iyang post sa Facebook, gipakita ni Inka ang screenshot sa ilang panag-istorya sa iyang inahan nga nagpahibalo kaniya sa maong makapaguol nga balita.
Sumala sa aktres, usa ka dakong brand ang nakahukom nga dili na ipadayon ang pagkuha sa serbisyo sa iyang inahan ug mogamit na lang og AI alang sa ‘voice-over’ niini. Wala hinganli ni Inka ang maong kompanya.
Gipangutana usab sa aktres ang mga dagkong brand kon mao ba kini ang kaugmaon nga ilang gustong padulngan, diin ang teknolohiya mopuli sa oportunidad sa mga tinuod nga tawo. Matod niya, ang AI angay lamang nga himan ug dili angay mopuli sa talento ug abilidad sa mga tawo.
Dugang pa ni Inka nga mailhan gihapon sa mga tawo ang kalainan sa ‘voice-over’, ‘artwork’ ug musika nga gihimo sa AI, tungod kay sumala kaniya, kulang kini sa kinabuhi ug pagbati kon itandi sa binuhat sa tawo.
Sa kataposan sa iyang post, nanawagan si Inka sa ubang mga brand nga hatagan og oportunidad ang iyang inahan alang sa ‘voice-over projects’.
Human niini, daghang netizens ang mipadayag sa ilang opinyon bahin sa paggamit sa AI ug sa posibleng epekto niini sa panginabuhian sa mga trabahante sa industriya sa pagkamamugnaon.
