Gibanabanang mokabat sa P817.87 milyon ang giingong unexplained wealth ni Vice President Sara Duterte ug sa iyang bana nga si Atty. Manases “Mans” Carpio gikan sa 2022 hangtod 2025, base sa pagsusi sa ilang mga financial records sa prosecution forensic expert nga si Atty. Alexander Cabrera.
Sumala kang Cabrera, lakip sa iyang gisusi ang mga kuwarta nga wala madeklara, personal ug ‘real properties’, kita sa magtiayon, ug ilang mga interes sa negosyo. Giapil usab niya sa pagkuwenta ang ilang mga kabtangan ubos sa ‘absolute community of property’ tungod kay wala siyay nakitang ‘prenup agreement’ o desisyon sa korte nga nagbulag sa pagpanag-iya sa ilang mga kabtangan.
Gibutyag usab ni Cabrera nga adunay mga ‘bank account’ ang magtiayon nga wala madeklara sa Statement of Assets, Liabilities and Net Worth o SALN ni Duterte.
Gipunting usab sa forensic expert ang giingong kuwestiyonableng mga transaksiyon sa bangko nga nahitabo sulod sa usa ka adlaw, ingon man ang mga personal ug ‘real properties’ nga wala madeklara ug nagkantidad og minilyon matag tuig gikan sa 2022 hangtod 2025.
Lakip usab sa pagkalkula ni Cabrera ang giingong kita ug mga kabtangan gikan sa mga interes sa negosyo nga CALE88, Metro City ug Gencorp.
Gibanabana niya nga ang kinatibuk-ang wala madeklarang kita ug mga kabtangan sa magtiayon milapas sa P800 milyon.
