GENSAN- Gipasabot ni Retired Judge Lorenzo Balo nga wala hukmi sa Korte Suprema ang merito sa petition ni Atty. Vic Rodriguez nga nagkuwestiyon sa voting threshold sa impeachment trial batok kang Vice President Sara Duterte.
Matud ni Balo, gibasura sa Supreme Court ang petition tungod sa kakulang sa legal standing ni Rodriguez.
Sumala kaniya, dili si Rodriguez ang direktang maapektuhan sa desisyon kabahin sa voting threshold, busa dili siya ang hustong tawo nga mosang-at sa maong kaso.
Giingon ni Balo nga kung kuwestiyonon ang voting threshold, si Vice President Sara Duterte mismo ang angay nga mosang-at sa kaso tungod kay siya ang direktang naapektuhan sa proseso sa impeachment.
Dugang pa niya, giingon usab sa Supreme Court nga dili pa “ripe” o andam alang sa judicial review ang isyu kabahin sa voting threshold nga gitakda sa impeachment court.
Busa, sumala kang Balo, wala pa gihisgoti sa Korte Suprema ang substansiya o merito sa maong isyu, tungod kay sa legal nga ‘technicality’ pa lamang gibase ang pagbasura sa petition.
