Dininig nitong Lunes, Enero 5, ng Regional Trial Court (RTC) ng Lapu-Lapu City ang mosyon na ibasura ang warrants of arrest na inihain laban sa contractor na si Sarah Discaya ukol sa P96.5-million “ghost” flood control project sa Davao Occidental.
Hiniling ni Atty. Michael David na ibasura ang warrant of arrest laban sa kanyang kliyente na unang naaresto at nakulong noong nakaraang buwan kaugnay ng umano’y hindi umiiral na flood control project sa lalawigan.
Naghain din ng mosyon ang mga legal counsel ni DPWH District Engineer Rodrigo Larete at walong iba pang opisyal ng Department of Public Works and Highways (DPWH) Davao Region upang ibasura ang information at warrants of arrest laban sa kanilang mga kliyente.
Katwiran ng mga abogado na walang hurisdiksiyon ang RTC Branch 27 ng Lapu-Lapu City upang dinggin ang kaso dahil ang mga akusado ay hindi high-ranking officials, at may salary grade lamang na mas mababa sa 27. Ang pinakamataas na opisyal na sinampahan ng kaso ay si Larete, na may salary grade na 25.
Sinabi rin ni Atty. Joseph Randi Torregosa, abogado ni Larete, na dahil umano’y naganap ang krimen sa Davao Occidental na nararapat lamang na doon din dinggin ang kaso.
Matatandaang inilipat ng RTC Branch 20 ng Malita, Davao Occidental ang venue ng kaso sa Lapu-Lapu City batay sa Supreme Court guideline na inilabas noong Nobyembre. Gayunman, iginiit ni Torregosa na hindi umano pormal na naabisuhan ang kanyang kliyente ukol sa desisyong ito.
Kaugnay nito, naghain din ng mosyon si Ombudsman Mindanao prosecutor Atty. Marie Josephine De Vera upang ibalik ang venue ng pagdinig sa RTC Branch 20 ng Malita, Davao Occidental.
Inaasahang maglalabas ng resolusyon ang RTC Lapu-Lapu City hinggil sa mga mosyon bago ang Enero 13, 2026, ang itinakdang petsa ng arraignment ng lahat ng akusado sa nasabing ghost flood control project case.
