GENSAN- Nanawagan karon ang pipila ka sektor, lakip na ang legal expert nga si Atty. Dominador Lagare Jr., ngadto kang Presidente Ferdinand “Bongbong” Marcos Jr. nga i-ehersisyo ang iyang emergency powers aron temporaryong tangtangon ang excise tax sa lana taliwala sa nagsaka nga presyo sa petrolyo sa merkado.
Sa pakighinabi sa Bombo Radyo Gensan, gipasabot ni Atty. Lagare nga ang pagtangtang sa excise tax maghatag og dinalian nga kahupayan o “immediate effect” sa mga konsumidor.
Sumala pa kaniya, kon moabot sa $80 matag baril ang krudo sa kalibutanong merkado, dako og matabang kon makuhaan ang presyo niini pinaagi sa pagsuspinde sa buhis.
Matod ni Lagare, ang kasamtangang sitwasyon mahimong isipon nga usa ka “man-made calamity” tungod sa tensyon sa Middle East.
Gipahimangnoan usab niya ang publiko bahin sa “domino effect” niini sa uban pang palitonon.
Ang pagsaka sa presyo sa krudo direktang makaapekto sa gasto sa pag-manufacture sa mga nag-unang palitonon sama sa sabon ug uban pa.
Maapektohan usab ang operasyon sa mga planta sa kuryente, nga moresulta sa mas taas nga bayranan sa utility. Kon mosaka ang gasto sa produksyon, segurado nga mosaka usab ang presyo sa mga produkto sa merkado.
Kini nga panawagan migawas dungan sa mga report gikan sa Department of Energy (DOE) nga posibleng mosaka og hangtod sa P10 matag litro ang lana kon magpadayon ang kagubot sa gawas sa nasod.
Tungod niini, gihatagan og gibug-aton ni Lagare nga kining “extraordinary times” nanginahanglan og dinalian nga aksyon gikan sa palasyo aron mabawasan ang kalisod nga giatubang sa mga ordinaryong Pilipino.
