GENSAN- Nagpahimangno ang buhatan ni Atty. Jong Gonzales,labaw sa public safety office ngadto sa mga tricycle drivers ug operators nga dili sila makakuha sa ilang prangkisa kon duna pa silay wala mabayrang mga citation tickets o traffic violations sa dakbayan.
Matud pa ni Atty. Gonzales, bisan tuod og 100 pesos lang ang bayad sa prangkisa, daghan ang nalisdan sa paglukat niini tungod sa nagpatong-patong nga multa gikan sa karaan nilang mga violation.
Gumikan kay computerized na ang sistema sa City Treasurer’s Office, dali na nga makit-an ang mga unpaid penalties sa higayon nga mokuha ang usa ka driver og cedula o uban pang dokumento.
Giklaro sa opisyal nga ang maong mga multa dili bayad sa prangkisa, kondili silot kini sa paglapas sa traffic rules.
Gihatagan og higayon ang mga driver nga ayohon ang ilang mga obligasyon sulod ning bulan sa Pebrero.
Hugot nga gipahibalo ni Atty. Gonzales nga sa pagsulod sa bulan sa Marso, kadtong mga unit nga wala gihapoy prangkisa tungod sa wala mabayari nga multa ang i-impound na sa mga otoridad.
