Nagpagawas og seryosong pahimangno ang Police Regional Office 12 o PRO 12 batok sa mga indibidwal nga nagapakatap og hulga o threats pinaagi sa social media.
Sumala ni Police Brigadier General Allan Manibog, Regional Director sa PRO 12, seryosong giisip sa kapolisan ang tanang matang sa online threats, bisan pa man kini gihimo pinaagi sa social media o ubang online platforms.
Dili usab garantiya nga makalikay sa panubag ang paggamit og dummy o pekeng account, tungod kay mahimo gihapon kining masubay sa mga awtoridad atol sa imbestigasyon.
Gipahibalo sa kapolisan nga aduna na’y mga indibidwal nga napasakaan og tukmang kasong kriminal tungod sa pagpanghulga pinaagi sa internet, bisan pa og ilang ipasangil nga komedya lamang o pabiya-biya ang maong mga post o mensahe.
Tungod niini, giawhag sa PRO 12 ang mga ginikanan nga hugot nga bantayan ug giyahan ang ilang mga anak sa responsableng paggamit sa social media aron malikayan ang mga lihok nga mahimong mosangpot sa kasong kriminal.
